#निषेधाची_आरोळी

असं काही वाचलं, ऐकलं, बघितलं...
छिन्नविछिन्न करणारा... 
की, जागा होतो आमच्यातला "माणूस".... 
मग 'निषेधाची आरोळी' आम्ही
कधी 'ट्विटर' वर 'हॅण्डल' करतो
तर कधी फेसबुक, व्हाट्स आप वर 'फॉरवर्ड' करतो....

सत्य असत्याचा "व्हायरल इन्फेक्शन " व्हायरस
मन आणि बुद्धीला आजारी पाडतो....
'निषेधाच्या आरोळ्या' माणूस मगं
अलगद एकावर एक मांडतो.... 

परवा घडलेल्या घटनेचा निषेध
काल संपत नाही तोच
आज नवीन प्रसंग घडतो....
कालच्या निषेधाच्या 'हँगओव्हर' वर
नवीन निषेधाचा 'उतारा'
कामी पडतो....

'निषेधाची आरोळी' ही अशीच
हवेमध्ये विरून जाते.....
जुनी 'निषेधाची आरोळी' मग
" जीवाश्माचं " रूप घेते....

करणारा करून जातो...
मरणारा मरून जातो...
तुमच्या आमच्या ' निषेधाच्या आरोळीची ' 'मेणबत्ती'
'विरोधी वारा' विझवून जातो....

© विवेक शिंदे...
अहमदनगर....